എന്റെ മനുഷി

എന്റെ മനുഷി
വല്ലാത്തൊരു പിടിവാശിക്കാരിയാണ്…
എന്നോട് എതിർവശം നോക്കി
തർക്കുത്തരം പറയുന്നവൾ.
ഞാൻ എന്ത് പറഞ്ഞാലും
അതിന്റെ വിപരീതത്തിൽ
ഒരു ലോകം പണിയുന്നവൾ.

“നമുക്ക് പുറത്തുപോയാലോ?”
ഞാൻ ചോദിച്ചപ്പോൾ—
അവൾ ചിരിച്ചു പറഞ്ഞു:
“വേണ്ട…
വെറുതെ ഇങ്ങനെ കാശ് കളയണ്ട.”

പിന്നീട് ഞാൻ പറഞ്ഞു:
“ഇവിടെ എനിക്ക് ശരിയാവുന്നില്ല…
അലഞ്ഞു മടുത്തു ഞാൻ.”
അവൾ ശാന്തമായി പറഞ്ഞു:
“നിങ്ങൾക്ക് മടുക്കില്ല…
നല്ലതൊന്നും വരാനുണ്ട്.”

പ്രവാസത്തിന്റെ നിഴലിൽ
വേദനകൾ ചുരണ്ടിയപ്പോൾ,
ഒന്നും ആവാതെ
തിരിഞ്ഞുപോകാൻ നോക്കിയപ്പോൾ—
അവൾ വീണ്ടും പറഞ്ഞു:
“ഇല്ല…
കുറച്ച് കൂടി കാത്തിരിക്കൂ…
ഒരു അത്ഭുതം
വഴിയിലുണ്ട്.”

ഒരു ദിവസം ഞാൻ പറഞ്ഞു:
“നീ പോകുന്നതിനു മുമ്പേ
എനിക്ക് യാത്രയാകണം…”
അപ്പോൾ—
അവളുടെ കണ്ണുകൾ നിറഞ്ഞു,
ശബ്ദം തളർന്ന്:
“വേണ്ട…
നമുക്ക് ഒരുമിച്ച്
പോവാം.”

ഇങ്ങനെയുള്ള
ഒരു ധിക്കാരിയെ…
ഒരിക്കലും കൈവിടരുത്.
അവളാണ്
നിന്റെ വഴികളിൽ
വിളക്കേന്തി നിൽക്കുന്ന
ഒരേയൊരു മനുഷ്യി.

— മുഹമ്മദ് ഷാഫി